Helderberg-Polla doen dit weer deur in Juniemaand die beste opkoms vir ‘n Polla aan te teken. Sowat tagtig Old Boys het by Laerskool De Hoop saamgekuier.
Groot dank aan Chris Theron (1991), Polla-portefeuljehouer op die OSU Uitvoerende komitee, Helgard Slabbert (1992) en Paul Benson (1990). Dit was absoluut uitstekend georganiseer.
Rektor André van Staden het ons ingelig oor die welstand van PRG en wat dit verg in vandag se tyd om ‘n staatskool in stand te hou en te bestuur. Dale Good (1993) het gesels oor hoe waardevol tyd is en hoe wonderlik dit sal wees vir Old Boys om betrokke te raak by skoolprojekte. Groot dinge kan met ‘n spanpoging bereik word.
